20160922 - 幼稚園讀醫？ 興趣班教人體骨骼生字

標題：幼稚園讀醫？ 興趣班教人體骨骼生字
報章：明報
網址：報導原文網址

網上流傳一張印有由綠茵英文幼稚園（馬鞍山）校名同校徽嘅英文工作紙，其中一版提供人體骨骼英文生字，如pivot joint（樞軸關節） 、saddle joint（鞍狀關節）等，要求學生看圖選生字填充；另一版以英文圖表解說骨頭結構、功能、如何保護，及斷骨原因同處理方法等。
Emily噚日打電話去呢間學校，了解係咪佢哋嘅出品，職員話工作紙來自「家長自己（幫子女）報嘅興趣班」，又話「同學校課程無關」，仲叫Emily為佢哋澄清。不過Emily之後見到網上有個說法係，派工作紙嘅興趣班其實係呢間學校安排嘅，Emily嘅同事於是親身去學校搵家長同校方求證，職員今次先至承認，張工作紙係來自學校嘅興趣班，但話家長可以自由選擇係咪報讀，之後又有職員話張工作紙已經係幾年前㗎喇。
Emily今次求證過程嘅挑戰性，真係分分鐘比得上小朋友做呢張工作紙嘅過程。教育大學幼兒教育學系助理教授林俊彬話，骨骼生字確係同生活冇乜關連，如果小朋友冇興趣，學咗都好快唔記得，又提醒如果要小朋友操作式抄寫生字，佢哋未必開心，仲可能因此對學校有負面觀感。