20131213 - 中環在線：收起「摩笛」 賓架籌款唱聖詩

標題：中環在線：收起「摩笛」 賓架籌款唱聖詩
報章：蘋果日報
網址：報導原文網址

聖誕節就快到，最好當然係與眾同樂，摩根士丹利超過60位賓架噚日5點半就喺九龍站ICC總部樓下商場圓方唱8首聖誕歌，順便籌款做善事幫助有需要嘅兒童。
大摩呢兩個星期喺公司內部舉行籌款活動，上周搞蛋糕拍賣，由同事自製蛋糕，每日拍賣4至5個，最貴一個蛋糕以2.4萬元賣出，由於拍唔到嘅叫價全部都要畀錢，所以所有蛋糕籌得嘅善款，都超過最終拍賣價。
本周就係籌款唱歌，每人至少要籌得2,500大元先可以加入合唱團獻唱，對於大摩呢班位位年薪過百萬、過千萬嘅賓架來講，一個人要籌2,500大元簡直易過借火，噚日就有超過60位賓架聯同一班小朋友一展歌喉，今年已經係佢哋第11年表演。整個籌款活動共籌得320萬元，將會撥作支持彩虹計劃。