4歲仔撞崩嘴爆喊
報章：蘋果日報
網址：報導原文網址
■小童在太古城體感浮床意外弄傷嘴流血，媽媽忙以紙巾為兒子止血。
太古城中心中庭嘅迪士尼彼思「The Big Splash」親子遊戲「體感浮床」，上個月17號有個小朋友畀浮床圍板劏開眼角受傷，要縫4針，估唔到個遊戲前晚last day又發生流血事件！有讀者前晚7點半見到年約4歲嘅男童喺浮床玩嘅時候，懷疑唔小心撞傷嘴流血，喊到拆天，佢媽咪即時喺身邊安慰，又用紙巾幫佢抹血。
根據女讀者前晚喺現場影到嘅相片睇到，受傷男童當時坐喺體感浮床邊緣以外嘅位置，現場地面唔見有血迹。意外發生之後，浮床遊戲曾經暫停運作咗一陣，工作人員檢查過證實冇問題之後重開。女讀者話睇唔到意外係點樣發生，覺得其實現場安全措施已算ok，佢認為最重要都係家長要贒實啲小朋友。
■體感浮床雖再有意外，但無損其他大人小朋友興致。
現場照大排長龍
《蘋果》記者收到消息之後，趕去現場已經見唔到受傷嘅男童同家人，但見到依然有好多大人同小朋友排隊等入場。體感浮床外貼咗安全告示，列明每一節（8分鐘）只限20人入去玩，避免太過擠迫，入場玩嘅人士必須要除鞋，但要着襪。12歲以下小童則一定要有家長或18歲以上監護人陪同，以保安全。現場嘅家長大部份都話唔擔心安全問題。
太古城中心發言人證實，前晚7點半左右有一個大約4歲嘅小童，喺體感浮床玩嗰陣嘴部擦傷，佢話當時小童懷疑係跳出池外嘅時候意外受傷，但傷勢唔算嚴重，在場有人幫佢包紮，之後由父母帶走，唔使送院。記者問發言人會唔會覺得場地安全有改善嘅空間？佢就話其實上個月發生意外之後，已經加厚咗護墊同埋保護圍邊，相信今次純屬意外。不過，體感浮床已經同大家say goodbye，稍後就會拆走。
